लातूरकरांना वाहतूक कोंडीतून मिळणार मुक्ती! पोलीस आणि मनपाचा संयुक्त ‘पायलट प्रोजेक्ट’ आजपासून सुरू

​लातूर (प्रतिनिधी) : लातूर शहरातील वाढती वाहनसंख्या आणि त्यामुळे प्रमुख चौकांमध्ये होणारी वाहतूक कोंडी फोडण्यासाठी जिल्हा पोलीस दल आणि महानगरपालिका प्रशासनाने आता कंबर कसली आहे. या समस्येवर कायमस्वरूपी तोडगा काढण्यासाठी आज, १२ मार्च २०२६ पासून शहरात एका विशेष ‘पायलट प्रोजेक्ट’ ची अंमलबजावणी सुरू करण्यात आली आहे.

​महत्त्वाची बैठक आणि निर्णय

​पोलीस अधीक्षक श्री. अमोल तांबे यांच्या संकल्पनेतून आणि मार्गदर्शनाखाली काल, ११ मार्च रोजी महानगरपालिकेच्या मीटिंग हॉलमध्ये एक उच्चस्तरीय आढावा बैठक पार पडली. या बैठकीला मनपा आयुक्त सौ. मानसी मीना, महापौर सौ. जयश्री सोनकांबळे, उपमहापौर डॉ. स्नेहल उटगे, आरटीओ विनोद चव्हाण यांच्यासह विविध विभागांचे अधिकारी उपस्थित होते. या बैठकीत शहरातील पार्किंग, अतिक्रमण आणि चौकांची सदोष रचना यावर सविस्तर चर्चा होऊन ‘पायलट प्रोजेक्ट’ राबवण्याचा निर्णय घेण्यात आला.

​प्रमुख चौकांची प्रत्यक्ष पाहणी

​आज सकाळी ९:०० वाजता पोलीस आणि मनपा प्रशासनाच्या संयुक्त पथकाने शहरातील वर्दळीचे केंद्र असलेल्या पीव्हीआर चौक आणि छत्रपती शिवाजी महाराज चौक येथे प्रत्यक्ष भेट दिली.

​पाहणीदरम्यान खालील बाबींवर लक्ष केंद्रित करण्यात आले:

• ​वाहतुकीचा प्रवाह: वाहनांची गर्दी होण्याची नेमकी तांत्रिक कारणे शोधणे.
• ​रस्ते व अतिक्रमण: रस्त्यांवरील अतिक्रमणामुळे कमी होणारी रुंदी आणि त्यामुळे लागणारे अडथळे.
• ​पार्किंग व्यवस्था: बेशिस्त पार्किंगवर नियंत्रण मिळवण्यासाठी उपाययोजना.
• ​सिग्नल यंत्रणा: वाहतूक अधिक सुरळीत करण्यासाठी सिग्नल व्यवस्थेची गरज तपासणे.

​काय असणार ‘पायलट प्रोजेक्ट’चे स्वरूप?

​या प्रकल्पांतर्गत निवडक चौकांमध्ये तातडीने सुधारणा केल्या जाणार आहेत. यामध्ये चौकांचे सुयोग्य नियोजन, अतिक्रमणावर कठोर नियंत्रण आणि वाहनधारकांसाठी योग्य पार्किंग झोन निश्चित करणे यांचा समावेश आहे. आजपासूनच या सुधारणांच्या अंमलबजावणीला प्रत्यक्ष सुरुवात झाली आहे.

​”शहरातील वाहतूक व्यवस्था शिस्तबद्ध आणि सुरक्षित करण्यासाठी पोलीस दल कटिबद्ध आहे. नागरिकांनीही वाहतुकीच्या नियमांचे पालन करून या मोहिमेला सहकार्य करावे.”

— लातूर जिल्हा पोलीस दल

​उपस्थिती:

या मोहिमेदरम्यान पोलीस अधीक्षक श्री. अमोल तांबे, मनपा आयुक्त सौ. मानसी मीना, महापौर सौ. जयश्री सोनकांबळे, उपविभागीय पोलीस अधिकारी श्री. समीर सिंह साळवे, वाहतूक शाखेचे प्रभारी श्री. मनोज जिरगे व इतर विभागांचे अधिकारी उपस्थित होते.