लातूर जिल्हा परिषदेचा मोठा पुढाकार! सेस फंडातून २ चिमुकल्यांवर 'कॉक्लिअर इंप्लांट' शस्त्रक्रिया यशस्वी; आता ऐकू येणार जगाचा आवाज
लातूर (प्रतिनिधी) : जिल्हा परिषदेच्या समाज कल्याण आणि दिव्यांग सक्षमीकरण विभागाच्या वतीने राबवण्यात येणाऱ्या कल्पक योजनेतून दोन कर्णबधिर बालकांच्या आयुष्यात नवा प्रकाश पडला आहे. जिल्हा परिषदेच्या ५% दिव्यांग कल्याण निधीतून (सेस फंड) लातूरमधील दोन बालकांवर ‘कॉक्लिअर इंप्लांट’ ही महागडी शस्त्रक्रिया यशस्वीरित्या पार पडली असून, आता या बालकांना जगाचे आवाज ऐकू येणार आहेत.
मुख्य कार्यकारी अधिकाऱ्यांच्या संकल्पनेतून आर्थिक बळ
कर्णबधिर किंवा कानाचा गंभीर आजार असलेल्या, पण आर्थिक परिस्थितीमुळे महागडी शस्त्रक्रिया करू न शकणाऱ्या कुटुंबांसाठी जिल्हा परिषदेचे मुख्य कार्यकारी अधिकारी राहूलकुमार मीना यांनी २०२५-२६ च्या अर्थसंकल्पात विशेष तरतूद केली होती. या ५% सेस फंडातून मिळणाऱ्या आर्थिक सहाय्यामुळेच ही शस्त्रक्रिया शक्य झाली आहे.
कार्तिक आणि मन्मथ यांच्यावर यशस्वी उपचार
या योजनेचा लाभ लातूर तालुक्यातील कार्तिक ज्योतीराम शिंदे आणि निलंगा तालुक्यातील सांगवी जेवरी येथील मन्मथ जीवन पाटील या दोन बालकांना मिळाला आहे. शनिवारी लातूर येथील प्रसिद्ध ‘गोरे कान, नाक, घसा हॉस्पिटल’ मध्ये ही शस्त्रक्रिया पार पडली.
तज्ज्ञ डॉक्टरांचा चमू आणि लोकप्रतिनिधींचे सहकार्य
ही गुंतागुंतीची शस्त्रक्रिया सुप्रसिद्ध कान, नाक, घसा तज्ज्ञ डॉ. आनंद गोरे आणि डॉ. सुधीर कदम यांच्या मार्गदर्शनाखाली यशस्वी झाली. या उपक्रमासाठी जिल्हा परिषदेच्या नूतन अध्यक्षा उषाताई पाटील तळेगावकर, उपाध्यक्ष दयानंद सुरवसे यांच्यासह आरोग्य विभागाच्या वरिष्ठ अधिकाऱ्यांनी विशेष पुढाकार घेतला होता.
