लातूर (प्रतिनिधी): शहरात गुन्हेगारीच्या घटनांनी पुन्हा एकदा डोकं वर काढलं आहे. शहरातील गजबजलेल्या कन्हेरी चौकालगत असलेल्या रिंगरोडवर एका ४५ वर्षीय व्यक्तीचा फरशी आणि सोफासेटच्या लाकडाने ठेचून खून केल्याची धक्कादायक घटना उघडकीस आली आहे. या घटनेमुळे संपूर्ण परिसरात भीतीचे आणि हळहळीचे वातावरण पसरले आहे.
नेमकी घटन काय?
मयत इसम विठ्ठल सोपान ससाणे (वय ४५ वर्षे, रा. मुगाव, ता. निलंगा) हे गेल्या काही काळापासून लातूर शहरात राहून भंगार गोळा करण्याचे काम करत होते. मिळालेल्या माहितीनुसार:
विठ्ठल हे दिवसभर भंगार जमा करून रिंगरोडवरील एका दुकानासमोरच रात्री झोपत असत.
मंगळवार आणि बुधवार (८ एप्रिल) च्या मध्यरात्री अज्ञात आरोपींनी त्यांच्यावर हल्ला केला.
हल्लेखोरांनी सोफासेटचे लाकूड आणि फरशीच्या तुकड्याने त्यांच्या डोक्यावर गंभीर प्रहार केले, ज्यात त्यांचा जागीच मृत्यू झाला.
मयत विठ्ठल ससाणे यांची पार्श्वभूमी
मुगावचे माजी सरपंच सुरेंद्र धुमाळ यांनी दिलेल्या माहितीनुसार, विठ्ठल ससाणे यांची पत्नी हयात नसून, त्यांना दोन मुले आहेत. उदरनिर्वाहासाठी मुले परगावी असतात, तर विठ्ठल लातूरमध्ये राहून आपला चरितार्थ चालवत होते.
पोलीस यंत्रणा ॲक्शन मोडमध्ये
घटनेची माहिती मिळताच पोलीस दलाने तातडीने सूत्रे हलवली आहेत:
घटनास्थळ पाहणी: पोलीस अधीक्षक अमोल तांबे यांनी स्वतः घटनास्थळाला भेट देऊन परिस्थितीचा आढावा घेतला.
तपासाला गती: उपविभागीय पोलीस अधिकारी समीरसिंह साळवे यांनी तपासाचे आदेश दिले आहेत.
आरोपींचा शोध: स्थानिक गुन्हे शाखेचे पोलीस निरीक्षक सुधाकर बावकर यांच्या मार्गदर्शनाखाली विविध पथके आरोपींच्या मागावर रवाना करण्यात आली आहेत.
